Hversdagshugleiðingar

Þrátt fyrir að hafa spjallað við símsvarann á áskriftardeild Fréttablaðsins, SEX SINNUM, er ég ekki farin að sjá blaðið. Ég er farin að halda að það hlusti enginn á þennan símsvara, þetta sé bara allt í plati.

Annars er það helst í fréttum að í dag eru 45 ár liðin síðan Háskólabíó var formlega vígt. Það kemur sjálfsagt enginn til með að halda upp á daginn, enda er bíóið ekki starfrækt lengur í sömu mynd og áður fyrr. Háskólabíó kemur alltaf til með að eiga pláss í mínu hjarta, því þar starfaði ég í 10 ár. Það voru yfirleitt góðir tímar og mikið líf og fjör. Ég held að ég geti jafnvel sagt að þetta hafi verið skemmtilegasti vinnustaður sem ég hef unnið á. Mannlífið þar var fjölbreytt, stundum hitti maður frægt fólk og svo gat maður stundum fengið að skella sér á tónleika hjá Sinfó.